Sumqayıt-Bakı qatarının elektrik naqilləri oğurlandı, yola düşə bilmədi - YENİLƏNİB

Baki-Sumqayıt-Bakı marşrutu ilə işləyən elektrik qatarlarının hərəkətində ləngimələr qeydə alınıb.

Bunu Oxu.Az-a açıqlamasında “Azərbaycan Dəmir Yolları” QSC-nin mətbuat katibliyi şöbəsinin rəisi Natəvan Bayramova deyib.

Onun sözlərinə görə, bu gün müşahidə edilən gecikməyə naqillərin oğurlanması səbəb olub:

“Bu gün səhər saatlarında Baş Sumqayıt - 6-cı blok/post mənzilinin 50-ci kilometrində kontakt şəbəkəsində kontakt naqilləri kənar şəxslər tərəfindən oğurlanıb.

Hadisə nəticəsində Bak-Sumqayıt-Bakı marşrutu ilə işləyən elektrik qatarlarının hərəkətində 6-31 dəqiqə arası ləngimə qeydə alınıb”.

Hazırda elektrik qatarları cədvəl üzrə hərəkət edir. Hadisə araşdırılır.

09:07

Sumqayıt-Bakı elektrik qatarında gecikmə olub.

Oxu.Az xəbər verir ki, səhər saatlarında Sumqayıtdan Bakıya gəlməli olan elektrik qatarları qrafikə uyğun hərəkət etməyib.

Belə ki, ilkin məlumata görə, səhər saat 06:55 və 07:17-də hərəkət etməli olan qatarlar yola düşməyib.

Qrafik üzrə 07:50-də Sumqayıtdan-Bakıya yola düşən elektrik qatarı mənzil başına 08:29-da yox, doqquz dəqiqə gecikmə ilə saat 08:38-də çatıb.

Problemə stansiyada elektrik enerjisi ilə bağlı yaranan nasazlığın səbəb olduğu bildirilir.