Cəbrayıllı məcburi köçkünlər Milli Məclisə müraciət etdilər - SƏBƏB

Cəbrayıldan olan bir qrup məcburi köçkün ziyalılar, yazarlar, Qarabağ müharibəsi veteranları və ictimai fəallar parlamentin spikeri və millət vəkillərinə müraciət ünvanlayıb.

Yenisabah.az xəbər verir ki, müraciətdə deyilir:

Hörmətli sədr, hörmətli millət vəkilləri!

İndiki ağır, ziddiyyətli, sınağa çəkildiyimiz bir durumda hesab edirik ki, Qarabağ problemi dövlətimizin, hər bir vətəndaşımızın diqqətində olmalıdır və diqqətindədir.

Cənab Prezidentin işğalçı Ermənistanla bağlı xarici siyasət müstəvisində elan etdiyi hücum diplomatiyası beynəlxalq hüquqa və sənədlərə, tarixi həqiqətlərə əsaslanır. Biz bunun fərqindəyik, bütöv xalqımız kimi biz məcburi köçkünlər bu xətti birmənalı şəkildə bəyənir və müdafiə edirik. Ancaq Ermənistan hökuməti, yalanlardan, uydurmalardan əl çəkmədiyi bir yana, işğalçılıq siyasətinin neqativ nəticələrini daha da genişləndirir.

Ermənistan beynəlxalq sənədləri və qaydaları saya salmadan Dağlıq Qarabağda, ətraf rayonlarda, gözümüzün önündə nümayişkaranə şəkildə nələr etmir ki!? Qanunsuz məşkunlaşma, yeni qəsəbələrin salınması, yer adlarının dəyişdirilməsi, azərbaycanlılara məxsus bütün maddi və mənəvi dəyərlərin məhv edilməsi... Şübhəsiz, siz bunlardan xəbərsiz deyilsiniz.

Amma müəyyən səbəblərdən işğalçıya layiq olduğu cavabı verə bilməmişik. Əks halda 30 ildir Ermənistan bu istiqamətdə əməllərini, fəaliyyətini, işğalçılıq siyasətini gündən-günə genişləndirməz, beynəlxalq hüquqa, tarixi həqiqətlərə meydan oxumazdı. Və bizim də ruhumuz, mənəviyyatimiz yenilməz, aşağılanmazdıq. Bu vəziyyətdə mənəvi sağlamlığımızı da lazımi səviyyədə qoruya bilmərik. Mənəvi gərginlik, qəzəb hissi fiziki sağlamlıqla bir araya sığmır.

Artıq ermənilərin bizi həqarət etməsinə dözə bilmirik. İnanırıq ki siz də, bütövlükdə Azərbaycan dövləti də, xalq da ermənilərin bizi aşağılamasına, şərəfimizlə oynamasına dözmür və nə qədər ki gec deyil, tez bir zamanda problemin həllini istəyirsiniz. Bu baxımdan şübhə etmirik ki, siz də 28 ildir aparılan danışıqların, Azərbaycanın ərazi bütövlüyü və suverenliyinin bərpası daxilində nəticə vermədiyi qənaətindəsiniz. Beynəxalq hüquq isə işğalçının qarşısına danışıqlarla, müxtəlif sanksiyalarla, hətta güc təbiqi ilə çıxmağı istisna etmir. BMT nizamnaməsinin 51-ci maddəsində konkret olaraq göstərilir ki, hər bir dövlət özünün ərazi bütövlüyünü müdafiə etmək üçün istənilən anda hərbi yoldan istifadə edə bilər. Lakin BMT TŞ-nin qətnamələrinə, digər çoxsaylı beynəlxalq qərar və qətnamələrə əməl edilmirsə biz bir dövlət olaraq ərazi bütövlüyümüzü, sərhədlərimizin toxunulmazlığını özümüz təmin etməliyik. Qafqaz regionunda ən güclü sayılan ordumuzun mövcudluğu, beynəlxalq hüquq buna imkan verir. Amma biz hesab edirik ki, bu istiqamətdə çox gecikirik. Həm də hər gün, hər saat gecikirik.

İndiyə qədər ATƏT-in Minsk Qrupunun 28 illik "fəaliyyəti" də, verdikləri təkliflər də heç nəyi dəyişməyib. Azərbaycan torpaqlarının 20 faizinin işğal olunması bütün dünya ictimayyətinə bəllidir.

Bildiyiniz kimi, Xocalı, Qaradağlı, Ağdaban və sair soyqırımını əks etdirən sənədlər, fotolar, ümumiyyətlə, işğala məruz qalmış günahsız Azərbaycanın həqiqətləri, bunların baiskarı olan ermənilərin iç üzü 28 ildir ki, dünya ictimaiyyətinə, dünya düzənini formalaşdıran fövqəlgüclərə çatdırılırsa da, bunlar belə ötən müddətdə nəyisə dəyişmədi. Çünki müasir dünya ikili standartlar siyasətinə sədaqətlidir. Hesab edirik ki, yüz illərdi dəyişməyən erməni xislətini və həmin xislətə münasibəti dəyişməyən dünyanı bu yolla dəyişmək mümkün deyil. Belə bir şəraitdə münaqişənin tarixi boyunca problemin parlamentimizdə mütəmadi olaraq ciddi müzakirə olunmaması bizi çox narahat edir.

Hörmətli parlament üzvləri! Sizlərə də aydındır ki, Qarabağı görən nəslin sürətlə tükənməsi, qarşılığında isə işğal altındakı Dağlıq Qarabağ və ətraf rayonlarda sürətli qanunsuz məskunlaşmalar, demoqrafik vəziyyətin ermənilərin xeyrinə dəyişməyə doğru sürətlə irəliləməsi və gələcək üçün daha ciddi problem yaratması münaqişənin həllolunma imkanlarını da böyük ölçüdə tükədir. Bütün bunlar Qarabağı da Zəngəzurun və digər itirilmiş torpaqlarımızın taleyinin gözləməsinə zəmin yaradan faktorlardır. Təcili və təxirəsalınmaz tədbirlər görülməsə yəqin ki, bundan bir neçə illər sonra başqa bölgələrimiz və nəhayət bütövlükdə Azərbaycan hədəfə alınacaq. Bu istiqamətdə durumun günbəgün bizim ziyanımıza dəyişmə sürətini azaltmaq və paralel olaraq problemin həllinə qısa müddətdə nail olmaq üçün təcili tədbirlər görülməlidir.

30 ildir ermənilərin torpaqlarımızı de-yurye özününküləşdirməyinin qarşısını almaq hüququna və qüdrətinə malik olduğumuzu ABŞ-Rusiya-Fransa üçbucağı quranlara kəskin şəkildə bəyan etmək və heç kimdən razılıq gözləmədən dərhal hərəkətə keçmək lazımdır. Biz bunu bu gün etməsək, didərginlik dövründə doğulan övladlarımız o torpaqların sahibi olduğumuzu son 25 ildə Qarabağda doğulan ermənilərə necə sübut edəcəklər? Odur ki, biz dövlət səviyyəsində təcili BMT-yə müraciət edərək ATƏT-in Minsk Qrupunun vasitəçiliyindən imtina etməli və silahlı qüvvələrimizin gücü ilə Qarabağda geniş antiterror əməliyyatı keçirməklə torpaqlarımızı işğaldan azad etməliyik.

Hörmətli millət vəkilləri! Hesab edirik ki, Qarabağ probleminin MM-də müzakirəsi ilə yanaşı, müharibə şəraitində olan bir ölkə kimi teleməkanımızda, bir sıra mətbuat orqanlarımızda bu problemlə bağlı müşahidə edilən soyuq və biganə münasibətin aradan qaldırılması istiqamətində də təsirli tədbirlər görmək vacibdir.

Hazrda Dağlıq Qarabağ münaqişəsinin həlli və eyni zamanda Qarabağ ətrafı rayonların işğaldan azad olunması ilə bağlı müzakirələr gedir, müxtəlif illərdə hazırlanan sənədlər gündəmə gətirilir, BMT-nin 1990-cı illərdə qəbul etdiyi qətnamələr xatırlanır. Bütün bunlar hakimiyyət üçün də, xalqın hakimiyyətə dəstəyi üçün də imkanlar açır.

Bütün bunları nəzərə alaraq istərdik ki, Milli Məclisdə Qarabağla bağlı komissiya yaradılsın, problem parlamentdə təcili müzakirəyə çıxarılsın, münaqişənin həlli ilə əlaqədar görülən işlər barədə ölkə ictimaiyyəti, dövlət sirri haqda qanunun yol verdiyi həddə mütəmadi olaraq məlumatlandırılsın, problemin köklü şəkildə həllinə imkan yaradan, nəticə verəcək qərarlar qəbul edilsin. Əmin olmağınızı istərdiki ki, bu istiqamətdə dövlətimizin atdığı addımlar tərəfimizdən, bütün məcburi köçkünlər və ümumiyyətlə bütövlükdə Azərbaycan xalqı tərəfindən dəstəklənəcək.