Azərbaycan-Qırğızıstan arasında strateji əməkdaşlıq xarici siyasətimizin hədəflərindəndir

Azərbaycan müasir dünyamızın gərgin bir dövründə- 30 ilə yaxın bir zaman kəsiyində ən böyük bir problemi, Qarabağ problemini, ərazi bütövlüyümüzün bərpasını həll etməklə böyük bir qələbəyə imza atdı. Bunu reallaşdırmaq üçün, iqtisadiyyatımızın gücləndirilməsi, güclü, müasir ordumuzun yaradılması, düzgün siyasətin aparılması ilə beynəlxalq səviyyədə hüquqi üstünlük qazanmaqla, milli həmrəylik nümayiş etdirilməsi olmuşdur. Bu qələbəmizin əsasını təşkil edir.
Artıq Azərbaycan öz iqtisadi qüdrəti ilə, müstəqil siyasət həyata keçirməklə özünün müstəqilliyini bir daha dünyaya nümayiş etdirdi. Azərbaycan bu günlər daha çevik xarici siyasət həyata keçirməklə özünün sülhsevər siyasəti ilə dünya dövlətlərindən dəstək almaqda davam edir. Tarix sübut etmişdir ki, nə qədər özünü güclü hesab etsən də, dünya iqtisadiyyatına inteqrasiya etmək, milli maraqlara uyğun dünya iqtisadiyyatına töhfələr vermək və əməkdaşlıq etməklə etibarlı tərəfdaş qazanmadan beynəlxalq müstəvidə uğur qazanmaq çox çətindir. Bu baxımdan Azərbaycanın hədəfi yeni strateji tərəfdaşlar qazanmaqdır. Bunun üçün ölkəmiz açıq və şəffav siyasət yürüdür.
Azərbaycan dərin tarixi köklərə söykənərək milli maraqlarımıza uyğun türkdilli xalqlarla tərəfdaşlığa önəm verir. Prezident İlham Əliyevin cari ilin 11 oktyabr tarixində Qırğızıstana dövlət səfəri bunun bariz nümunəsidir. İki ölkə arasındakı əməkdaşlıq nəzərdə tutulandan daha tez həyata keçirilir. Qırğızıstan - Azərbaycan İnkişaf Fondunun yaradılması çox mühüm hadisədir. Bu fond inkişafa, investisiyaların cəlb edilməsi işinə, iş yerlərinin yaradılmasına və ticari-iqtisadi sahədə əməkdaşlığın genişləndirilməsinə, hər iki tərəfin mənafeyinə uyğun perspektiv ideyaların formalaşmasına zəmin yaradacaqdır. Yarım il öncə imzalanmış strateji tərəfdaşlıq haqqında Bəyannamə artıq yeni reallıqlar ortaya qoyur. Mədəni-humanitar, iqtisadiyyat, təhsil, yüksək texnalogiyalar sahələri ilə bağlı perspektiv məsələlər müzakirə olunur.
Dost-Qardaş ölkə olan Qırğızıstan Azərbaycanla dərin tarixi köklərə söykənməklə, tərəfdaşlığını genişləndirməklə bundan sonra da qarşılıqlı olaraq beynəlxalq səviyyədə dəstək qazanmağı hədəf seçdiyini, Azərbaycanın tərəfdaş dost-qardaş ölkə olmasından qürur duyduğunu dövlət səviyyəsində bəyan etdi.
Bakı və Bişkek qardaşlaşmış şəhərlərə çevrilib. Bişkekdə ən böyük məktəblərdən biri Azərbaycan dövlətinin banisi Heydər Əliyevin adına, digər məktəb isə dahi Azərbaycan şairi və mütəfəkkiri Nizami Gəncəvinin adına verilməsi, Qırğızıstan-Azərbaycan Dostluq Parkının açılması bu yolda gələcək perspektivlərimizin təməli olmaqla, dostluq-qardaşlıq və etibarlı tərəfdaşlığımızı simvolizə edir. Təhsil ocaqlarının açılması, tərəfdaşlığın təməlini gücləndirməklə, yüksək səviyyəli gənc nəslin yetişdirilməsinə və dostluğumuzun möhkəmləndirilməsinə güclü təkan verəcəkdir. Dilimizin, dinimizin və mədəniyyətimizin yaxınlığı inkişaf dinamikasına uyğun əməkdaşlığımızın möhkəmləndirilməsinə geniş imkanlar yaradır.
Biz inanırıq ki, Prezident İlham Əliyevin düzgün xarici siyasəti nəticəsində Azərbaycan-Qırğızıstan dostluğu, qardaşlığı yeni mərhələyə qədəm basmaqla, bütün sahələrdə hər iki ölkənin milli maraqlarına uyğun inkişafın perspektivlərini formalaşdırmaqla, qısa bir zamanda iqtisadi dirçəlişə təkan verməklə dostluğumuzu daha da möhkəmləndirəcəkdir.
Biz inanırıq ki, Azərbaycan-Qırğızıstan tərəfdaşlığı etibarlı və qürur verici olmaqla, əbədi dostluq və qardaşlıq ənənələrinə sadiqliyi nümayiş etdiriləcəkdir. Bu yolda hər iki qardaş ölkəyə uğurlar arzulayırıq.

Allahverdi Piriyev,
Salyan rayon Ziyalılar Birliyinin sədri, Əməkdar Müəllim.